كتكوت ضعيف الجناح والدنيا غدرت بيه
رماه عليا الهوا وشكانى من اللى فيه
صعب عليا وخدته لاجل انى انا اربيه

قلبى الحنين جعلته عش يسكن فيه
فى الصيف يضلل عليه
وفى الشتا يدفيه
وطعمته من حب عينى كل ما يكفيه
وسقيته كاس الحنان ترياق دوا يشفيه
قام لما ريشه طول والعافيه جريت فيه
جرح قلبى وهجرنى ولاف على غيرى
اتاريه خسيس ما طمرش خيرى فيه
حزينة دخلت فرح مالقتش مطرح فيه
و القلب لما انجرح ما عرفت مين يداويه
الشوك في قلبه طرح و الحيرة سكنت فيه
الناس قالولي انه الصبر حيشفيك
انا قولت و الله جبال الصبر ما تكفيه
اللي انكتب انكتب
و لا عادش منه رجوع
و الجرح جرح الزمان حتى الدوا ممنوع
مالقتش غير الدموع نزلت عليه تكويه