ياما الخليج . . .

خد بشر من عيالهم
عيال كان أملهم
يحسوا بمعاني الأبوة وجمالها
يخافوا اذا الساعة عدت حداشر
ويستنوا ياخدوا ف حضنه العيدية
فــ مين اللي قال الهروب مسئولية !
ومين اللي قال ان لمّ الدراهم
هيجعل ولادك يحسوا بأمان
انا اعرف غلابة وعمال نضافة
عرقهم بيملى الزمان والمكان
وكل الفلوس ف البنوك والاراضي
ماتسواش وجودهم ف لمة فطار
سلام للي عيّط وساب قلبه واقف
بيستني ابوه عند باب المطار
لكن برضه عيب اني الوم اللي سافروا
وتعبوا وعافروا
وامنوا بوطنهم لحد اما كفروا
أكيد هما يعني قلوبهم بتبكي
مافيش حد عاقل بيتمنى غربة !
لكن لو بلدهم بتقتل بقسوة
فلازم هيمشوا مادام هي تربة
يصونوا اللي فاضل ف بكره لعيالهم
ياكل اللي ناضلوا وشدوا رحالهم
ورهنوا حياتهم مقابل مدارس
واكل وملابس
وتمن المكيّف
وحق المصايف بدم المصيّف
واسرة سعيدة
قريبة وبعيدة
يقابلوا ولادهم ف شركة صرافة
ويمشوا معاهم لحد الأرافة
يصلوا عليهم
ف كام متر رملة ،،،
وهل ده اسمه أمَله اني اموت قبل ما احيا !
وهل فيه ف مشاعرك حاجات لسه صاحية
باعيّط وباضحك
بالوم بس باعذر
بلادي التي كل يوم فيها موت
بتكتملي صوتي بحق اني عايش
بابوش لما بافضل واكون بره بايش
اجيب حق موتي وحق الغوايش
وتسمحلي اشوف العيال ف الاجازة !
وهل ده وطن يبقي ليه أي عازة ؟
بلاد فيها عالم ف عنق الازازة
ياتطلع ف غربة ياتفضل تموت
ياغربة حزينة بتشبه مدينة
بتبني الضغينة
وتمحي البيوت
بأكد لذلك ،،
بإن السكن في نواحي الزمالك
وإن اشتراك النوداي الكبيرة
وفكرة وجود الجراج ف العمارة
لايمكن يساوي الوقوف ف السفارة !
وأكد بإن الهدوم وسط ناسك
تمنها يزيد عن وقوفك ف zara
تنقّي بسنين اللي غابوا وسابوك
جواكت تمنها مشاعر ابوك
وجذمة تساوي مرتب سكاته
ووجعه لانه مشافش اللي ماتوا
وحزنه ف بلاد الوجع والاهانة
يارب اللي سافروا
إيدك معانا
يعودوا لبلادهم
ويبقوا السند والوسيلة لولادهم
وتستر فؤادهم
ماحدش يشوف المصيبة ف مسافر
وتجعل طريق المطار عودة بس
يارب اللي عيّط وفكّر وحس
ورب البلاد اللي خانها الضجيج
تخلي البلد دي لأهل البلد دي
وتجعل بلاد الخليج للخليج .
(أفضل إجابة)
++1
ويييييين اسمك هذا ما قد شفته من شهوور!