حب مؤجل .. الجزء الرابع والأخير

4 141 4 5

الحب

اجى عمي المسا وقعدنا حكينا وبالسهرة قال خليني قلك شو صار بالشب الي قلتيلي عليه ابتسمت وقلتله اي شو صار قال شكله عاجبك ياضرسانة صرت اضحك قلتله مو اعجاب عمي يعني بس قلي شو صار قال ماحدا جاب سيرته بعاطل والشب شغيل وفهمان وعنده بيت ومو ناقصه غير شغلة وحدة قلتله شو هي عمي قال يابنتي مو دارس قلتله عمي في شي بأخلاقه ؟ قال لا حرام مافي منه قلتله ما بصلي ولا ما بصوم ولا بعمل فواحش قال لا اعوذ بالله قلتله في شي مو منيح عنه قال لا قلتله اي ما وقفت ع العلم في أشياء أهم بكتير من هيك بنظري قال بس انتي دارسة ياعمي وتعبانة ع حالك قلتله عمي شفت عليه شي مو منيح قال لا قلتله مهمتك هلأ تقنع اهلي قال هو هاد السبب الي مخليني احكي معك هيك ، اهلك .😱😱 سكتت انا شوي قال عمي اسمعيني الشب منيح من كل النواحي بس هي الشغلة مارح تعجب أهلك ابدا انا صرت ابكي ماعد اعرف شو بدي اعمل صار عمي يهديني وقال خلص الموضوع علي .. اخدت اجازة يومين بعدها قررت خلص بدي روح ع الدوام واخرتها يعني وكان يوم عادي جدا وانا راجعة المسا قلتلها راما شو رح تتأخري قالتلي اي شوي انتظريني قلتلها انا تعبانة رح ارجع قبلك قال لا انتظري ما بتأخر انتظرتا شي نص ساعة لحتى عصبت قالت يلا مشي حسيت الطريق طويل ما بعرف ليش او السواق غير الطريق او في شي عم يصير قلتلها قالت انت تعبانة هلأ رح نوصل شوي وقفنا عند مطعم قلتلها شو ؟؟ قالت ولا شي انزلي قلتلا ما قلتيلي معزومة ع حسابك هههه قالت يلا خلصيني تأخرنا مو ع حسابي قلتلها لكن حساب مين ؟ قالت فوتي ، فتنا اخدنا طاولة عادية وكل شي عادي بس المطعم مافيه حدا قلتلها مين جاي ؟ قالت قومي معي اخدتني ع الحمام وقالتلي حطي مكياج قلتلا شوفي فهميني ؟ قالت مفاجأة وصارت تضحك قلتلها ما رح اعمل شي لتقولي قالت انتي الخسرانة وغمزتلي قلتلها اي مو مهم وطلعت وانا متدايقة وهي وراي عم تضحك اول ما وصلت ع الطاولة حدا من ورا غمضلي عيوني قلتلا راما حلي عني مو رايقة لحركاتك سمعت صوتها قالتلي وقفي وشوفي وراكي عملت متل ما بدا فتحتلي عيوني لقيت رائد قدامي لابس طقم اسود وعامل شعره وريحة عطره بتشل باختصار طالع بجنن ومعه بوكيه ورد احمر كبير عطاني ياه مع ابتسامة كبيرة انا اخدته وهيك مندهشة ما بعرف شو اعمل ولا شو احكي لحظات هيك عم اتأمل فيه وبالورد بيدخل عمي ورفقاتي واهل راما وناس كتير وكلهم مزبطين حالهم كأنه جايين على عرس انا متفاجأة كتير صرت اضحك ما بعرف شو حسيت ،، طالع خاتم ومسك ايدي وقال هلأ صرتي الي متل ما وعدتك ابتسمت وصرت طلع ع الارض كتير خجلت لبسني الخاتم قدام الكل والفرحة بعيونه ومسك ايدي وقال وعدتك ووفيت بوعدي وانتي الي وانا الك بس غمرته بقوة وصرت ابكي يمكن هي اسمها دموع الفرح ما بعرف بس شعور رائع عشته بهديك اللحظة .. كملنا السهرة وتعشينا ورجعنا ع البيت وانا طايرة من الفرح مبسوطة لدرجة خيالية ما قدرت نام من السعادة بس قاعدة فكر فيه وكيف بدنا نكمل سوا حياة وحدة ببيت واحد ويصير عنا اولاد صغار حلوين متلنا يملو حياتنا ضحك ويزيدوا الحب الي بيننا ..


عمي حكى مع اهلي بالاول اعترضو بس بعد شوية دموع مني وشوية حكي من عمي وافقو وخطبنا رسمي انا ورائد وكتبنا كتابنا وصرنا كل يوم نشوف بعض ساعات طويلة رجعت متل اول ضحكتي ما تفارقني ومجنونة وبحب الحياة مافي احلى مني مر شهرين خطبة ولا احلى منهم بحياتي وبعدها قررنا نعمل العرس لانه اهلي ماقدرو يجو ووصو عمي فيني ووافقو نعمل عرسنا بدونهم اجت ام رائد واخته وحضرو عرسنا كان احلى يوم بحياتي اني اخيرا صرت مع الشخص اللي بحبو ومتأكده انه هو كان حاسس نفس الشي لانه لمعة عيونو وقت يطلع فيني بتحكي .... مر ع زواجنا سنة وصار عنا بنوتة صغيرة بتشبهو بملامحها بس بيضا متلي ههههه وصار عمرها شهر سميناها وعد مشان تكون برهان حبنا وتنفيذ وعدنا لبعض

..
بعد هالايام الحلوة كتير مابصير تكمل معنا زادت المشاكل بسوريا ووصلت للضيعة اللي نحن فيها ... وبيوم كان طالع من البيت وقلي مارح اتأخر بس بدي جيب شوية خبز وغيرو البيت ماعد فيه اكل ترجيتو مايروح لاني ماكنت مرتاحة صار يقلي الله بيحميني انني ادعيلي مابعرف شو حسيت وقتها بس ما كنت مرتاحة ..
صار المسا ولسا مارجع ولا في اي خبر عنو وتلفونو خارج التغطية شو القصة ياربي شو صاير معو ؟؟
مابعرف كيف صار الصبح لاني ماحسيت ع الوقت بس عم فكر فيه وادعيله يرجع بالسلامة .. شي الساعة ثمانة بكير رن تلفوني رقم غريب رديت فورا قلي انتي ام وعد سوسن ؟ قلتلو اي مين ؟ قال انا الدكتور وحابب طمنك انو زوجك عنا وحالتو مستقرة اذا حابة تجي تشوفيه بالمشفى الفلاني .. اجاني الخبر متل الصاعقة شو صرلو ليش بالمشفى لبست فورا واخدت بنتي وع المشفى ..

اول ماوصلت ع غرفتو لقيتو متسطح والاجهزة عليه قال الكتور انو انصاب براسو ونزف كتير بس الحمدلله انو حالته مستقرة والنزيف توقف وقدر يذكر اسمك لحتى نخبرك بس هلأ نايم شوي اذا بتحبي تنتظريه قلتلو رح ضل عندو وافق وقلي بس يصحى بتخبرينا ..
بعد شي ساعتين صار يحكي كلام مو مفهوم بعدها فتح عيونو وقلي اخيرا اجيتي قلتلو الحمدلله انك بخير قال صرت تمام هلأ لاتروحي بدي تكوني اخر شي بشوفو بالدنيا قلتلو شو هالحكي بعيد الشر عنك صار يضحك قال وينها حبيبة بابا عطيتو ياها ضمها لصدرو ضمة قوية وقلي هي البنت امانتك انا صرت ابكي وقول بعيد الشر مارح يصرلك شي ورح ترجع وتربيها معي وتجوزها احلى شب قال هاد بأيد الله بس انتي رح تهتمي فيها وكأني معك قربت منو باسني ع راسي وباس وعد وغمض عيونو ....
ناديت للدكتور اجى بسرعة فحصه قلي اطلعي من الغرفة وجاب اطباء معه وممرضين انتظرت كتير ليطلعلو اخر شي طلع الدكتور وقلي انتبهي لوعد وادعيلو قلتلو بدي شوفو قلي الاعمار بيد الله ...


ماعد اعرف شو صار غير اني صحيت بسرير المشفى ع صوت بنتي عم تبكي وراما عم تحاول تهديها اخدت البنت منها وسألتها شو صار قالتلي ريحي حالك انتي وبس تهدي بحكيلك قلتلها وينو رائد هو وعدني ما يتركني قالتلي روقي حبيبتي وهدتني لحتى نمت ..
قمت تاني يوم بكير لقيتها نايمة ع الكرسي عندي بالغرفة وبحضنها وعد تذكرت كل شي وصرت ابكي ماتخيلت انه راح وتركني لحالي مستحيل هو وعدني مارح يتركني كيف قدر يتركني ويروح .. اتقبلت الامر بعد فترة وقررت كمل حياتي ونفذ وصيتو الي وربي هالبنت اللي ضلتلي من ريحتو وخليها احسن بنت بالعالم لانها حاملة اسمه ...

كل يوم يمر عليي كأنه سنة بس لازم اصبر وربي بنتي اللي بتشبهو لانها احلى شي ضل بحياتي .. كل يوم قبل مانام اتذكرو واحكي معه وادعيله كتييير قبل مانام ..

هي قصتي مع اكتر شخص حبيتو بحياتي وانا رح ضل عند وعدي وماحب حدا غيرو مع انه اجاني عرسان بعده بس مستحيل بدله بحدا بالعالم ..
حافظو ع الناس اللي بتحبوها وعبرولهم عن حبكم لانو رح يجي يوم تتمنو تسمعو صوتهم او تشوفوهم لو دقيقة ..
ملحق #1
انا ذهبتبيقولو هيك شي
ملحق #2
مفترس الإجاباتالقصة مقتبسة من واقع 😉
ملحق #3
مفترس الإجاباتلا انا مو راما 😂

راما الحقيقية عمرها اكبر مني

حتى بالقصة عمرها اكبر

لكن صحيح راما هي الي حكتلي 🌸😉
انتي بتالفي روايات وقصص
قريت القصة كاملة, هل فعلا حدثت لك ؟
أنتي راما أكيد ... إذا كانت حقيقية
لأنو لا احد سيعرف هذه التفاصيل غيرها
الحمدالله ...روحي نامي بقا
×